U 10 di lugliu 2009 - Toni Casalonga

U 10 di lugliu 2009

Nata l’idea di fà seminarii-cuncerti, à a quale subitu aderiscu, mi si pone a quistione : cume fà ?

A capiscu bè ch’ellu s’agisce di mesculà artisti e studiosi. Ma ci hé dinò un altra esigenza chi stà indè a natura stessa di u prugettu INCONTRU : fà chi Sardegna, Toscana e Corsica s’incontrinu.

Ne parlu incù Ghjuvan Petru, e a mè chi mi si paria d’esse di u mistieru, ellu risponde subitu incù una tranquilla sicurezza : hè simplice, sò trè terre separati per u mare. Basta à pone trè tavulini separati, e à fà pusà a l’ingiru i pueti.

- Iè, d’accordu, dicu tandu eu, ma l’incontru ?

- E bè, mi risponde ellu, sempre tranquillu e sicuru, a un certu mumentu fà d’issi tre tavulini unu solu maiò. L’idea he semplice, e ùn’hè ancu detta chi a vecu cum’hè un muvimentu tectonicu, cume un lentu avvicinamentu di e terre stesse. Entusiastu sò, e subitu sviluppemu u cuncetu.

Perchè avemu decisu, per allargà a cumpagnia, d’invità i pueti balearini e u « slameur » Dgiz. Per i balearini, basta un tavulinu di più. Una terra di più, chi si bagna indè u listessu mare. Ma u slam ? U discorsu di a terra ùn ci entre più, perchè Dgiz hè senza ligame (senza pastoghje ?) e porta tutte e so radiche à l’internu di se stessu. Allora Dgiz starà arrittu, abbraciatu a à so enorma contra bassa cume Ulisse a u so maghju. Ma, liberamente andarà di quà e di là, da terra a terra e a mezu mare.

Sempre discutendu incù Ghjuvan Petru, hè stabilitu a scenografia, urdine e u modu di cantà e di prisentà :

-       A l’iniziu, ogni cumpagnia di pueta a u cumpletu stà a u so tavulinu, Dgiz arritu in un scornu cum’ellu si deve.

-       A Corsica, ella, ùn ne prisenta che due soli, u più anzianu (Roccu) e u piu ghjovane, Cristofanu. Facenu elli u primu dialogu di prisentazione di i toscani.

-       I toscani cantanu.

-       Due altri pueti corsi, a pusà indè u publicu, s’arrizanu, avanzanu cantendu per prisentà i balearini.

-       E cusì via, pianu pianu sò i pueti corsi, a due a due, à arrizassi, à vene, avanzassi, cantà i pueti e cumedianti invitati, e dopu pusà incù l’altri.

-       E, quandu tutti hannu cantatu, avvicinemu tutti i tavulini, « femu una sola terra » di quatre terre chi s’incontrenu. E, indè u fratempu, Dgiz si move e s’intramette facendu interventi brevi e forti.

E cusì fù, incù una sola differenza, ma d’inpurtanza : i sardi ùn hannu pussutu veni !

Ci fù ancu un’altra cosa chi per noi un’era privista, l’intervenzioni di i nostri partenarii ricercatori e studiosi per prisentà « l’ottava rima » e « il maggio ». Tutti interessantissime, di cumpetenza e di valore.

Ma tandu ci ne semu avvisti chi u tempu di u spettaculu, chì hè quellu di u cantu, di u teatru, ha una misura altra che quellu di a « cathedra », è chi u publicu rissente l’unu cume tropu breve è l’altru tropu stesu.

E chi, sopra tuttu, quandu si mette unu a buleghju di l’altru, a percezione d’issi due tempi si rompe. A questione resta posta : quale pò esse a forme di u seminariù – cuncertu ?

Toni CASALONGA,

15/04/2010.